呢排天氣乍暖還寒，北京嗰邊睇傷風感冒嘅病人，多到逼爆醫院！香港呢邊還好，不過少少作感冒總係少不免！九龍城老牌泰菜館——金寶，新出咗個合晒時令嘅鱷魚菜，冬蔭功＋鱷魚打老邊、沙嗲醬拮鱷魚肉串燒，食完包你成條氣順晒！
記者：朱崇德
攝影：譚盈傑
九龍城真係香港「小泰國」，大中小泰菜館加埋足有20間，香港冇乜邊個地方咁集中！
16年歷史，屬九龍城區開國元老級泰菜館嘅金寶吳老闆解釋：「由城寨年代開始，九龍城就好多泰國人聚居，起初只係擺吓地攤做小販，慢慢就變成菜館，泰國人、泰國菜館，慢慢就變為九龍城一個特色！」
創新菜泰國冇得食
金寶呢個金漆招牌，除咗因為老字號，以及同區有5間連鎖舖，更聞名之處係呢度是名人飯堂，阿倫、李克勤、黃貫中都係擁躉，300餘呎舖頭，粉牆全是名人提名；就記者拍攝當日，就撞正麥玲玲上嚟開飯，「記得開舖初期，蔡瀾就係其中最早嚟嘅名人，我仲記得佢同我講做餐館最緊要有特色，於是我想出了活蝦刺身，當時全港獨家，日賣超過150碟；另一原創熱菜係爆漿蝦丸，以爽滑蝦膠包大頭蝦膏，日賣超過2,000粒！」
「特色、創新」可以話係金寶16年金漆招牌不變原因！今次泰菜×鱷魚肉，唔好話香港，就算走去泰國都冇得食：「鱷魚肉有滋陰、治咳、下氣平喘等功用，最正係寒燥底人士都啱食！同出面餐廳大不同處，係我哋唔用鱷魚肉亁，全部起用新鮮急凍鱷魚肉，包保營養同藥用價值發揮至最高！」
冬蔭功打邊爐鱷魚肉$78
冬蔭功湯好多地方都有做，香茅、番茄、南薑等份量各不同，「要味道好！最緊要連頭、連殼落大頭蝦！」蝦殼在湯中散發香氣，頭內的蝦膏引發出鮮味！薄切鱷魚肉落湯，基本略灼轉色即熟，味道有點點似雞，但密度、口感更高，而且全無脂肪。飲過鱷魚燉湯，驚佢有腥味，但鮮肉＋冬蔭功湯的辣香一逼，完全食唔到腥味！除鱷魚肉惹味，跟菜仲有粉絲，好讓你打完邊爐的肉汁同靚湯，用粉絲吸味，等你連汁都撈埋。
泰式沙律鱷魚肉$60
乜個沙律咁辣嘅？原來係泰式！碎切鱷魚肉，加亁葱、鮮辣椒粒、米碎、薄荷葉香炒，諗起都清新香辣；入口發現仲有酸酸的香醋吊味，伴新鮮未煮的青頭角、泰國茄瓜同食，新鮮酸辣，純原始風味。
泰式串燒鱷魚肉$60/6支
呢個係泰菜還原基本步，做沙嗲串燒，難度分是鱷魚肉本身屬低脂肪肉食，燒得佢夠鮮嫩，全靠大廚火路的掌控；沙嗲汁略帶甜甜椰香味，入口感覺唔太辣，感覺好Balance。
粉絲海鮮鱷魚肉$78
個個菜都辣，唔係人人食得啫！呢個滾湯，以魷魚、鮮蝦加鮮雞湯做底，配粉絲、蘑菇、葱段清滾，入口鮮而清，鱷魚肉則滋補，飲落好舒服。
活蝦刺身$70
呢度嘅招牌菜！泰國草蝦鮮剝，配椰菜、甘笋絲伴碟，最惹味係個酸辣醋汁，加青檸、蒜片同撒面；蝦極彈牙，非一般日本甜蝦可比！據知是將蝦放入雪櫃冰鎮過先有如此口感；食肉時謹記要同伴菜同食，汁留菜隙中，先食出多種不同口感，切記！
麥師傅試食報告
呢度冬蔭功一向出名靚，用鱷魚肉打邊爐幾特別；味道唔腥、仲幾鮮！兩者味道好夾，而且對氣管仲好好㖭！
必試推介
結霜泰國啤
泰國SINGHA啤好多人飲過，我畀嘅評語係「澀到難以入口」，不過吳老闆就想到一個結霜式做法！把雪到變霜的酒倒入酒杯中，馬上變成半杯思樂冰！再試，完全唔苦，麥香感覺濃好多，吳老闆話：「結霜飲法，仲有一個更高層次飲法，就係空肚直灌，你會感覺一股『凍柱』由喉頭直衝落肚！」可恨自己已一肚鱷魚肉，試唔到，真失敗！
睇路搵食
金寶泰國菜館（27163013）
地址：九龍城衙前塱道15、25號地下
座位：200個
營業時間：11:00am-1:00am
