全城禁煙，有時會覺得趕得煙民咁絕好慘咁；但諗深一層，逼人食二手煙，無端端減人哋壽就仲無辜，的起心肝戒咗佢喇。問題係心癮一到，冇嘢揸手冇嘢放入口又確係好難頂；見大家講嚟講去，都係話食香口膠、萬樂珠、蘋果、甘笋咁代替煙仔，冇乜特別，所以今日搵CoCo諗咗啲有咬口同埋潤吓肺嘅小食，整定放喺身邊，易整、靚、好食、擺得又就手，就唔使成日心思思搵番垃圾桶支煙仔喇。
記者：劉昱蘭
攝影：陳盛臣
模特兒︰Aries
潤肺果子 冰糖楊桃
需時：35分鐘
材料：楊桃1/2個、水1/2杯、糖1杯、白醋1/2湯匙、食用色素/油各少許
知多啲︰雖然楊桃沒有特別成份有助戒掉煙癮，但食煙少不免傷肺，食番啲清熱潤肺嘅楊桃就最適合不過。
做法
1.楊桃洗淨切片成星形，每片以竹籤串起。
2.糖、水及白醋放入鍋，以中火煮至糖溶，邊煮邊攪拌及掃走鍋邊的糖小心易燶。
3.落色素後多煮25分鐘，直至溫度達140℃及杰身，放入楊桃串蘸上糖漿。
4.楊桃放在掃上油的器皿上免黐底，待糖漿在楊桃上凝固即可。
百合釀蛋卷
需時：５分鐘
材料：鮮百合2粒、蛋卷2條、糖漿大半杯
知多啲︰一入冬，小記媽咪最愛煲沙參百合湯，話夠潤肺喎，所以得知百合可潤肺止咳。不過最潤最止咳，就係你食住支百合蛋卷，有嘢揸手自然忘記支煙仔啦。
做法
1.百合洗淨，刨走上端黑泥。在底部以刀一轉，即成一瓣瓣。
2.大火煮滾弄楊桃時剩餘的糖漿，放入百合片至變色（約半分鐘）。
3.蛋卷開半後，放上百合片即可食用。
煙煙韌韌 雙炸牛蒡銀杏
需時：10分鐘
材料：牛蒡10厘米、銀杏12粒、油適量、青紫菜粉少許
知多啲︰日本人好鍾意齋炸牛蒡作小食，加埋炸完之後煙煙韌韌的銀杏，脆口又有煙韌亦得。煙韌的銀杏仲潤埋肺止埋咳，一舉兩得，簡直係戒煙良伴唔少得。
做法
1.牛蒡邊洗邊去污泥，可用百潔布。
2.銀杏洗淨即炸約半分鐘撈起放在牛蒡上，撒上青紫菜粉。
香炸昆布
需時：5分鐘
材料：昆布10厘米、黃豆粉2湯匙、油/水各適量
知多啲︰昆布原來可以炸作小食，炸完似香口膠煙煙韌韌。記住留番昆布水，煲湯煮麵夠晒清甜，有助排便。
做法
1.洗淨的昆布剪成幼條。
2.起油鍋以大火炸昆布至起泡及挺身。
3.每條昆布逐一沾上適量的黃豆粉即成。
食得清淡易戒煙
淨係靠小食代替食煙，口感唔夠嘅，原來體質呈鹼性，同埋食得清淡啲，會有助戒煙，因為酸性同刺激性食物，都會引起煙癮。鹼性食物例如蔬果、水果、奶類，代謝後會產生鈣、磷、鈉、鉀等電解質。
參考網頁︰ http://clie.ws/bbs/lofiversion/index.php/t90687-150.html