賭馬有各門各派，有人信近績，有人信晨操，有人計步速，甚至有人專捉騎練動態，正所謂「家家有求」，真係冇話邊個啱邊個錯；正如賭波一樣，有球迷就專捉賠率，成日以為同莊家玩捉心理，不過有時搞到連自己都亂埋。
賠率升跌未必反映贏輸
賽馬同賭波最大分別，就係賽馬係彩池制，馬會收晒所有投注，抽佣抽稅後先派俾中彩人士，除咗極少數一面倒大熱門勝出，可能個別彩池要蝕本，否則根本就唔存在「被煲爆」情況。相反足球莊家開盤，反而要承受同賭客對賭風險，所以開出賠率要考慮平衡，如果上下盤都咁多人買，就穩執約10%水份。不過好多波友，往往將莊家神化，成日以為莊家開賽前已經知道邊隊贏邊隊輸咁；無錯莊家掌握咗資訊，係比一般波友多，不過小弟認為，莊家已經將所得資訊，投放在賠率上，唔會諗咁多陰謀論。
以利物浦近兩次盃賽對阿仙奴為例，雙方係足總盃第3圈先對碰，利物浦主W足智彩最後跌到2.05倍，結果阿仙奴反而作客贏3:1。3日後再對，足智彩開個主W初盤為1.95倍，其實賠率較熱，已反映莊家將阿仙奴預料派出較弱陣，利物浦連打兩場主場等對主隊較有利因素，投放在賠率上；不過唔少波友就一廂情願，以為主W較熱，係莊家認為利物浦贏面更大，結果主W飛數落到1.8倍樓下，阿仙奴贏得仲多，大炒6:3開埋個200倍波膽；所以賭波唔可以單睇賠率咁簡單。文：牽牛