年近歲晚，都係時間證券界派成績表。國際會計師公會同大福證券，喺去年12月中旬搞嘅「06年度十大我最喜愛股票選舉」，噚日亦公布得獎名單。長期落後大市嘅滙豐，依然係港人最愛。
亞軍同季軍，分別由年中升完再升嘅港交所及國壽奪得。炒到㷫烚烚嘅中資五大銀行股，幾乎全部上榜，只有中行例外。總計H股佔6間，大笨象同思捷嘅大本營都唔喺香港，應算係國際公司，淨港資嘅企業似乎只剩港交所同地鐵。難怪負責調查嘅譚學林好感慨話，有啲擔心港企喺恒指會繼續邊緣化。
今次調查亦問到投資成績，受訪嘅2000幾個市民中，買股票嘅85.9%話有賺，6.5%損手。舊年炒窩輪輸嘅佔4.8%，只有2.7%嘅人有賺。雖然只有43.9%嘅人幫襯基金，但受升市帶挈，當中40.9%嘅人都賺錢。至於買外滙嘅，賺蝕比例係25.3%同4.9%；買黃金嘅10.3%有賺，1.9%蝕。正股獨旺，92.6%受訪者無炒樓，賺蝕比例則是4.4%及2.9%。