「拳王」空降英超睇波！我求大俠收到料，年屆花甲嘅美國電影拳王洛奇史泰龍，將會喺周日愛華頓迎戰雷丁時亮相撐場，目的係為翻身作洛奇第6集《洛奇：拳王再臨》（RockyBalboa）做強勢宣傳！
為兩軍美國同胞打氣
據知，今次請龍伯過去英國睇波嘅幕後搞手，係「拖肥糖」新股東羅拔艾爾；原來，佢早喺去年入股時已經同班球迷講定今次嘅「洛奇約會」，呢鋪履行承諾，認真牙齒當金使。儘管我求大俠唔曉得羅拔艾爾先生，無啦啦點會搵美國「拳王」去睇波谷人氣，但香港搶先上演緊嘅《洛》片，喺英國嗰邊要去到下周二先放映，所以龍伯受邀，絕對唔會放過出鏡機會，順路睇吓英國有冇自己市場嘛。
唔知係天公造美抑或係人為安排，今次龍伯遊英睇波之餘，咁啱撞正幾個同胞齊齊落場；事關「拖肥糖」有門將侯活，而雷丁亦有中場干維和門將夏尼曼係美國人，龍伯或者可以一邊諗番自己當年有份參與嘅足球電影《勝利大逃亡》，一邊幫自己友打吓氣。
「拖肥糖」行政總裁韋尼士話：「球迷對史泰龍光臨葛廸遜公園（愛華頓主場）感到興奮，而洛奇呢粒『體育巨星』就橫跨幾個年代，喺體育迷心內佔有特殊位置！」哦，原來係有啲深層寓意嘅。
「龍伯事隔16年先推出第6集，我求大俠都好佩服佢不死精神，兩隊波睇見60歲嘅『拳王』坐喺場邊，落場都唔敢『揸流攤』啦！」