港股大起大落，有人繼續唱好、有人鳴金收兵，更有人扒冷，mercedes喺《公眾投資168綜合論壇》講，佢同事喺股市贏咗幾萬銀，所以打電話問佢點樣沽期指，「最重要係，佢覺得個市應該跌！」
網友回應中，教mercedes點沽期指嘅唔多，但質疑期指跌嘅就唔少，kg2話：「由9000點等股災等到20000嘞，等到幾時呢？」
小估民教訓mercedes個同事，「佢求求其咁喺個市度賺到啲錢，就學人去做期指，唔使好快會輸番晒落去。」
kkccho08就勸mercedes：「你唔好教佢㖭，一陣佢沽到死咗就賴你！」
幾十萬好快變炮灰
mercedes都好同意各方網友所言，「佢嗰幾十萬好快變炮灰，唔輸期指都會輸喺股票度。」阿牛2就慫恿mercedes：「教佢，然後你揸期指，咁就合法地將佢啲錢過落你嘅口袋。」
信誠證券聯席董事連敬涵說，港股現時風高浪急，恒指雖然有機會繼續調整，補番聖誕時的裂口位；但現時外圍股市前景未明，港股隨時有機會扯高，故沽期指風險相對較高。他提醒散戶，真的要沽期指，最緊要睇實個市。