靚女固然多人錫，又靚又性感加上愛心爆棚的靚女，更加搶手。混血名模AmandaS.前晚出席一活動時，大晒幸福地表示近日天寒地凍，手腳冰冷的她，獲男友Christian以雙手為她捽暖手腳，認真恨死隔籬。
李彩華、官恩娜及AmandaS.前晚以「願望大使」身份往尖沙嘴出席活動，其中AmandaS.在低溫下仍以低胸背心上陣，大為搶鏡，她說：「我覺得都唔係好凍，做模特兒慣晒冬天着夏天衫啦，不過我平時手手腳腳都會無緣無故好冰冷，好彩男友好sweet好細心，會用手捽暖我手腳。」
自讚好酒量
談到酒量，AmandaS.表示因自幼由父親訓練，故酒量甚佳，她說：「不過好奇怪，我飲多咗都嘔唔出，我好怕嘔，第時如果陀BB嘅話，都唔知點算，或者收養一個啦。」AmandaS.又透露因曾在「母親的抉擇」做義工，所以湊BB有一手，她說：「我試過帶印度籍嘅BB行商場，搞到啲人眼望望，同埋我幫BB換尿片好叻。」
至於另一嘉賓官恩娜則剛從高雄山區工作回來，但在當地卻懷疑遇上靈異事件，她說：「我有晚返到酒店冇嘢做，就貪得意玩自拍，然後send咗張相畀朋友，之後我朋友打嚟同我講話張相除咗有我之外，仲多咗隻窗同埋個人頭，之後我連續病咗幾日，呢幾日冇人陪，覺得好孤獨，唔知係咪唔夠『陽』氣所以惹到污糟嘢呢？」
採訪:顏英儀 攝影:陳志嵐
