韓國人氣偶像Rain今晚開始一連3日喺亞洲博覽館舉行演唱會，噚日下晝4點左右，佢坐酒店提供嘅白色凌志房車由灣仔出發去場館綵排，當佢架車駛到青馬大橋時，因為超速而被警察設置嘅路障以雷射槍測到，最終要喺青馬大橋收費站被警察截停，估計當時佢架車嘅車速已超過咗100公里，即係比當時嘅時速限制80超過咗20公里，結果緊隨其後嘅嘅保鑣車同八架採訪車都即時停車，嚇咗現場警察一跳，唔知發生乜嘢事，以為車入面坐住個政要高官。
忽然守紀律
當各間報館嘅記者落車影相時，警察當然即刻趕車仲鬧話：「走喇！唔係拉晒你哋。」問阿Sir阿Rain架車超速幾多同扣幾多分時，阿Sir就話：「唔講得你聽。」但據馮仁昭對交通條例嘅了解，雷射槍會調低5公里，所以估計Rain架車應該超速15公里，將會扣3分。手續辦完之後，阿Rain架車嘅司機即時變得好守紀律，就算行經限制時速110公里嘅路段，佢都只係行80，慢慢將車駛往亞洲博覽館。
另外，Rain前日下晝係記者會結束後，被安排同香港嘅fans見面。有fans送上掛有Rain天使造型嘅自製直升機模型畀佢，令佢喜出望外，即時攞上手把玩一番。
