今次〈投資特攻隊〉選材方面，真係要同韋斯咸球迷講聲對唔住，熱捧由前韋斯咸主帥柏度領軍嘅主隊查爾頓，博「讓球」平手盤，喺有鬥弱隊唔識踢及作客倫敦市慘情兩大弊病嘅米杜士堡身上，取得坐和望贏優勢；冷門就敲富咸作客贏韋斯咸！華度
查爾頓新領隊柏度喺上月底上任後，球隊即時喺聯賽連續兩場成功取分，兩場都係主場賽事，分別打和同市球隊富咸2:2，以及2:1擊敗阿士東維拉。雖然最近兩場又落得輸波下場，分別0:4慘敗阿仙奴腳下，以及足總盃0:2負甲組隊諾定咸森林出局，但都係作客秩序。
「塞翁失馬，焉之非福」，足總盃出埋局之後，對現時聯賽護級形勢仍然吃緊嘅查爾頓嚟講，餘下賽季就可以專心每場聯賽部署。今周佢哋又返到主場作賽，對手亦只係下游份子米杜士堡，呢舖輪到查爾頓「反底」絕唔出奇。
米堡作客倫敦腳軟
比較不利嘅因素，可能係球隊目前重有戴倫賓特呢位國腳射手因傷倦勤，但攻擊中場安祖列特及隊長右後衞楊格，都有望喺今周傷癒復出。無咗戴倫賓特，入球力多少都有影響，但贏波唔使場場大炒，主場踢得謹慎啲，一個入波都足以制勝。相信呢點華度諗得到，柏度無理由諗唔到啩！
米杜士堡近4場1勝，而連同上周足總盃作客打和侯城1:1之後，呢支東北部球隊由開季到𠵱家，仍然未能夠打開客場勝利之門！再加上米杜士堡今季作客倫敦市球會，除咗打和阿仙奴之外，對熱刺、富咸、甚至「升班馬」屈福特，全部輸波收場。對阿仙奴能夠打和，亦唔係一個值得秤高佢哋嘅理由噃，「米堡」今季重喺主場贏過車路士㖭！不過對住同級或弱隊，即刻走樣。
「雙咸」大戰客隊秤先
冷選方面，繼續喺倫敦市玩埋，韋斯咸主場對富咸呢場同市打吡，照睇韋斯咸班球員近期喺比賽態度方面嘅問題，重未解決；近5場全和嘅富咸，今季客場作賽係睇到有明顯進步，主隊雖有般莫廸呢位前富咸隊長倒戈，「噱頭」多過實際，讓波難靠，直情博客隊贏埋都得。
投資特攻隊金句
米杜士堡今季就係咁，對強隊有辦法爆下冷，對同級或實力更次嘅弱隊，唔知係咪鬥心爭啲，長輸長有！