意甲聯今周歇冬後重開，從各隊軍情所見，大部份都復操約一個禮拜，比賽狀態好成疑問；通常呢啲情況，主隊會佔較大優勢，今次早飛一於先買定兩支主隊：巴勒莫同卡利亞里。
巴勒莫踏入12月開始「散散地」，不過好在有歇冬期，等球隊可以叉番電。睇番巴勒莫季初就打出3連勝，仲開咗兩次「主其他」，證明佢地入局快，今次主W可以信。烏甸尼斯呢支神經刀，後防一向唔穩陣，只靠前鋒入得多波掩飾，不過陣中最有名前鋒伊亞昆達，球會講到明有錢就可以羅致佢，試問伊亞昆達重邊有心情同你搏命；基恩、廸拿達利呢啲前鋒，級數亦係平平，真係信唔過。
卡利亞里就一向靠小島主場威力，不過上半季就死晒火，只贏過兩場咁大把，好在首席射手蘇亞素傳聞俾AC睇中，都重未走得住，攻力有番啲保證。今次卡利亞里主場對阿斯科利，阿斯科利歇冬前千辛萬苦，便主場贏基爾禾3蛋，取得聯賽首勝，不過佢地作客認真差，9場作客輸足7場，唔貪心卡利亞里W可以早買。
波圖甚少連續失威
最後搵來葡超賽事，博波圖作客贏艾維斯兩球以上；波圖周日主場輸波，葡萄牙盃出局，呢啲班霸好少連續失威，作客尾2嘅艾維斯，真係要大炒番場發洩，「讓球主客和」的「客勝」要早捧。文：牽牛