港股噚日走勢好反覆，先升後跌，恒指曾升過130點，但午後就倒跌200點，收市19385，跌182點。H指個勢仲係好弱，最低9466，收9511，再跌137點，已係連續第6日下跌。
恒指最低19350，基本上已可算補回上月27日的上升裂口（19321至19512），由高位已下跌超過1200點。H指仲「杰」，由高位10878到低位9466，足足跌咗1412點，跌幅係13%。中資股升得速，跌得亦急，由上月中的9000起步，升1878點，現時已調整咗升幅的75%，短期跌勢應可告一段落，入市博反彈的時機已出現。
香港中旅（308）早輪曾升上2.67元，之後反覆回落，昨日在2.40元水平重獲支持，且一度掃上2.48元，回收2.45元，逆市而升4仙。中旅有如此強勢表現，主要係客觀經營環境對中旅愈來愈有利，有幾間大行同芬佬都睇得好好，目標價有可能倍升到5字頭。
坐三望四應無問題
高盛同瑞銀都發表報告，指08年奧運概念已被視為今年的重大投資主題，中旅主要經營旅遊及酒店業務，正係奧運概念的最大受惠者，估計未來一兩年盈利會急升。
基金看好中旅，理由仲有好多：
[!81A1]業績向好。中旅在港澳經營5間酒店，接待旅客人數近年上升10%，房租上升12%，而今年繼續有加價條件。珠海的海泉灣度假村去年開業後大受歡迎，每日接待遊客9000人，今年可開始提供盈利貢獻。人民幣持續升值亦好有利。
[!81A2]去年3月啓用的芒果網已與3400多間中港澳酒店建立合作關係，現時已成為全國第3大旅遊網，發展潛力極大。
[!81A3]重整概念。旗下的非核心業務渭河電廠會出售，專注發展高回報及高增長的旅遊業務。
[!81A4]注資概念。中旅今年會展開龐大併購行動，並會注入招商國旅業務，迎接08年奧運及內地旅遊普及化的大潮流。
基金睇中旅見5字頭，𠵱家睇嚟似乎遙不可及，但以中旅愈來愈有利的經營條件而論，股價坐三望四應無問題，現價上車，有機會賺5成。
郭兆誠