仲有一個月左右，就到小朋友最開心嘅農曆新年，唔單止有新衫、新鞋着，仲有用新銀紙封嘅利是收。
雖然「送舊迎新」係中國人傳統，但係每年為封利是而額外發行嘅新銀紙就高達3億張，重成300公噸，足足可以填滿20個廿呎長貨櫃，另外仲要用400公噸棉花，生產3億張特製紙張，用嚟印新銀紙。
咁唔環保嘅事，金管局局長任志剛舊年已經呼籲大家用「雖舊仍新」嘅銀紙（fitnote）封利是，仲搞咗個fitnote命名及標語創作比賽，畀班小學生發揮才華，結果「迎新鈔票」勝出。任總覺得「迎新鈔票」個名聽起上嚟同「仍新鈔票」一樣，既環保又吉利，因此佢語重心長咁呼籲大家響應環保，使用「迎新鈔票」封利是。
其實地球先生已經捱到五勞七傷，為咗下一代着想，睇嚟大家真係要聽任總嘅話，用「迎新鈔票」封利是迎新年喇。