傅穎（Theresa）是組合Cookies中較文靜的一個，自獨立發展後，Theresa眼見其他隊友忙於工作，自己卻只有默默等待。不過遲來的列車未必是壞事，今年公司有意力捧Theresa為才女，工作數之不盡，用守得雲開見月明來形容Theresa，可謂最貼切不過。
自Cookies成員作獨發展後，在鄧麗欣（Stephy）、楊愛瑾（Miki）、吳雨霏（Kary）及傅穎四人之中，Theresa看似是比較空閒的一個。不過踏入07年，公司打算力捧她做才女，上半年的工作已排得密麻麻。Theresa早前接受訪問時如數家珍，把工作日程表娓娓道來，她說：「1月頭開始籌備新碟，兼且幫TVB拍劇；2月拍廣告；3月應該會拍兩部戲，一套同寵物拍嘅，另一套就同韓國藝人合作來； 4、5月就會再寫多本書，諗住7月夾埋唱片一齊推出。公司叫我試下填詞，之前試過填國語歌詞，今次應該係廣東歌。」
計劃學韓文
面對一大堆工作，外表柔弱的Theresa顯得信心十足，她說：「我有心理準備會好忙，06年係少啲工作，但有信心呢一年會好過上年。」除了公司鋪路，Theresa也決心改變，她說：「當務之急就係收身，我覺得上鏡塊臉包咗少少，最好減到5磅，唔知係咪之前成日坐喺度寫書有關，腰同腳都多咗肉。」Theresa又急不及待的說：「仲有我想學韓文，最主要係遲啲會同韓國人合作，自己又鍾意睇韓劇。」
另外，Theresa去年推出的畫冊，令她初嘗「話事」的感覺，她興奮地說：「第一次差唔多所有嘢係我負責，出書嘅過程令我好滿足，畫嘅畫、寫嘅文都係自己話事，出版社又聽晒我講。」
採訪：王連連 攝影：陳俊強
髮型：VincePangofILColpo
化妝：DeborahVaughan
