證監會早排搞咗個意見調查，叫市場人士評吓佢哋工作表現。雖然大家好畀面，話佢哋依然係亞洲最佳證券監管機構，之不過，整體評分較6年前嘅同一調查，只係高咗0.1分，得6.7分，律師、會計師同港交所嘅評分下降咗，其他人就畀分高咗，所以拉高咗啲。來自53個機構嘅355個受訪者認為，雖然證監響執法方面已顯著改善，但永遠都有可改善嘅地方，咁係乜地方呢？
原來，連外人都睇唔過眼，認為證監應該增聘高級職員，同時要處理中級同初級職員流失率偏高嘅問題，要搵啲有經驗同熟悉市場嘅人。
另外，既然曾特首都高舉發展金融旗號，咁證監響引進新產品方面唔可以咁保守，要改善規則嘅清晰度、回應速度同決策要一致，最好減少不必要嘅文書同埋確保上市公司質素，尤其係內地公司。華華相信，證監最鍾意睇到嘅呼籲，就係大家叫佢哋行使權力對付大型執法案件，同執行雙重存檔制度囉。