香港演藝學院表演系畢業的王祖藍，加入無綫三年，最近憑為劇集《東方之珠》的凌風（郭晉安飾）作幕後代唱，引起觀眾注意。祖藍自知身形不算高大，難以憑外形令人留下深刻印象，故努力向多方面發展，希望藉後天培養的才華教觀眾對他另眼相看。
王祖藍自03年加入無綫後，短短三年間工作一直平穩發展，畢業於香港演藝學院表演系的他甫畢業即簽約無綫。早前他一直主持收費台兒童節目及擔任幕後配音的工作，去年有機會參演新劇《我外母唔係人》，其後更憑為劇集《東方之珠》的郭晉安作幕後代唱而為人熟識，祖藍自言從小聽母親唱70年代的懷舊歌曲，故演唱時有驚無險。
其實祖藍主持兒童台節目時已吸納了一班小朋友fans，近日為郭晉安代唱則令他增加了一批較年長的fans，他說：「都冇諗過有咁大迴響，原本只係打算代唱一、兩首，點知之後就唱晒，居然唔見到個樣，只係把聲反而有咁大迴響，可能出樣未必有咁好反應。咁我都好多謝安仔，因為佢成日會同人講話係我代唱。」
自知外形輸蝕
個子不高的王祖藍自知身形較其他男藝人輸蝕，他說：「我外形一定輸晒喇，好彩公司少好似我呢類型比較騎呢玩嘢嘅，可以講係弱點，但亦都係優點，都可以算係我優勝之處。」出身表演系的他表示最想向戲劇方面發展，希望觀眾接受他的聲音之餘，也能接受他的外形和樣貌。
採訪：王崇穎
攝影：陳偉權
服裝提供：Bauhaus
