中國經濟急速增長，喺上海及深圳交易所上市嘅公司，市值前日已超逾10萬億元人民幣，直迫市值13萬億嘅港股，市旺自然要搵人幫手做嘢，做咗湊仔公成3年嘅前財政司司長梁錦松亦終於搵到嘢做。
入Blackstone搞收購
美國私人投資公司Blackstone集團公布，將會喺香港設立辦事處，仲搵咗阿松做集團大中華區聯席主管，協助佢哋拓展業務。Blackstone係收買佬，專長係收購，以阿松過去喺政經界嘅人脈關係，相信新工一啲都難唔到佢。
查實阿松都係典型嘅獅子山下人物，靠拼搏上位，曾經做過美國花旗銀行香港區大班，之後又跳槽美國大通銀行，又同時出任多項公職，01年仲做埋財政司長，加上02年娶咗中國國寶之一嘅跳水皇后伏明霞，風頭真係無人可媲美。
風頭無兩「零智」打沉
但樹大招風，有人爆料話佢喺加汽車稅前偷步買架「零智」新車，就搞到佢周身蟻，雖然話買架新車係為咗方便接載即將出世嘅千金，之不過加上好心做壞事嘅前特首老董，最後都只有辭職呢條路。
咁呢3年除咗全職做湊仔公外，阿松都有搵工，之不過做過銀行大班兼財爺，要轉都唔係咁容易。早輪佢就曾聯同坡仔嘅「兜把星」星展集團洽購廣東發展銀行，以為到手可以入去廣發行辦事，但又輸咗比花旗大國嘅花旗銀行。𠵱家除咗做中國工商銀行嘅非執行董事外，啱啱先至叫做正式搵到一份全職工作。
[email protected]