美股前晚個勢唔錯，港股昨日開市就搶上去，但沽盤都好進取，好快恒指過百點嘅升幅就唔見咗一半，晏晝㗎仔個市偏軟，港股班淡友就加大力度，恒指再跌182點收市。
恒指20日線守唔住，成交雖然縮咗，但睇個勢仲要試低位，50日線喺19170附近，同𠵱家個指數仲有210點距離，睇嚟好淡雙方會喺未來呢幾日仲有大廝殺。
睇番外圍個市，美股昨晚炒上嘅機會唔細，不過咁唔擔保今日港股會升，原因係短線嘅市況仍然係淡友佔優，好友只能夠等候機會反擊。睇吓大摩又出研究報告，重申睇淡A股市場，仲提醒投資者要注意A股評級有被調低嘅風險，咁樣講法，對投資者有好大嘅威脅，唱淡A股唱得咁密，唔知為乜，最怕就係有大沽盤同降低評級嘅報告跟尾。港股個賭場咁大，大戶經常你一劍，佢一劍，你一言，佢一語，好容易殃及池魚，大家炒輪好似刀鋒舔血，都係要小心啲好。
恒生C輪1318：恒生（011）昨日報收108.20元，升0.55%，近日個市反覆下跌，恒生就反覆上升，仲一路創新高，睇慣圖嘅喺恒生升破103元後都知道恒生前途一片光明，除咗本地經濟好，大陸嘅商機之外，𠵱家多咗人睇淡滙控（005），自然會有一啲換馬盤追入恒生，睇嚟恒生同阿媽嘅走勢仲會繼續背通而馳，恒生破埋110元之後，就睇120元，基金對於升勢持續嘅大價股向來好有興趣，大家可以留意吓恒生C輪1318。1318昨收74仙，槓桿率14.6倍（有效12.8倍），正股升上110元同120元，1318應該唔會低過90仙同1.80元，正股跌穿106.80元止蝕。
俊 樺