PS3無Game吸引?上星期Bandai突然公布《高達無雙》，結合《高達》同《無雙》，睇到發布畫面，完成度有7、8成。沿用《無雙》系統，再將三國人物換成高達內各種機體，讓玩家一嘗以高達面對上千渣古嘅震撼場面。唔好以為《高達無雙》只係以多取勝，憑住PS3過人機能，可以保證畫面內千百機體時仍然流暢爽快，更會加強遊戲內各種細節，好似機體反光面，可反射現場實況，部份機體如卡碧尼亦會顯示出新視覺效果。
360度宇宙戰
《高達無雙》主要收錄《機動戰士Gundam》、《機動戰士ZGundam》同《機動戰士ZZGundam》內劇情，除阿寶、加美尤等主角，亦可選用馬沙等反角。基本操作方法如同《無雙》，要經常面對大量敵方機戰，並加入以往《無雙》所欠缺加速系統，令操作更複雜多變。另外唔少得一提宇宙戰場，將會以360度方式視覺顯示場景，不過遇到敵機作戰，會轉回平面操作，狂抽之際，都唔會迷失方向。
遊戲未定推出日期，相信可吸引唔少對PS3有興趣的玩家決心出機，希望BandaiNamco認真啲，唔好學《高達TargetinSight》咁，雷聲大雨點少。
記者：許福合
網址： http://gundam-musou.jp/