自古有云：美酒配佳餚，除了邊品嚐美食邊飲靚酒外，以酒入饌可去除材料的腥羶澀味，而酒精在烹調過程中揮發掉，只留下酒香，所以多食都唔怕醉。最近世紀酒店推出海中珍寶自助晚餐，當中有多款以中、西酒煮成的美食，究竟用中還是西酒煮嘅菜較出色？於是兩方擺下擂台，邀請食客做評判，誓要分出高下！
記者：林思樂
攝影：楊錦文
Model：Angel、鋒
試食兵團
雞鴨組 肉夠嫩滑
中式代表：玫瑰露豉油雞
國產酒派出香味溫醇的玫瑰露，玫瑰露以高粱酒為原料，配以玫瑰花蒸餾和冰糖釀製而成，最適合用來烹調肉類。今次師傅將玫瑰露加入豉油雞，令味道較重的雞肉散發清新花香。
黎先生：我覺得雞肉好鮮嫩，雞好食啲！
西式代表：金巴利干邑汁鴨胸
洋酒代表是法國干邑，只有採用法國干邑區葡萄釀製的白蘭地才能稱為干邑，因這地方的葡萄果味特香，口感柔順，與濃味肉類非常配合。今次大廚以干邑煮鴨胸，去除鴨羶味，而醬汁還加入酸甜金巴利（Cranberry），中和鴨肉的濃味，散發清甜果味。
林小姐：鴨胸有陣果香，冇咗陣羶味仲好食。
綜合意見
豉油雞的玫瑰味好芳香，而且雞肉好嫩滑；而鴨胸與干邑味道好夾，整體來說，豉油雞的味道和質感較優勝。
賽果
中式豉油雞3票
西式鴨胸2票
海鮮組 除腥味加甜味
中式代表：紹酒甜豆炒鮑貝
紹酒是糯米酒的一種，以清澄的鑒湖水釀製，能去腥味，多用作烹調海鮮。師傅用紹酒去除鮑貝的腥味，甜甜的紹酒更能提升鮑貝鮮中帶甜的特點。
榕仔：飽貝甜甜哋好好食。
西式代表：砵酒焗青口
砵酒是原產葡萄牙的紅葡萄酒，果糖豐富，酒精濃度高，所以酒味強而帶甜。砵酒與海鮮是絕配，可去除強烈的海水味，一般用於生蠔，今次大廚就用來炮製新西蘭青口，青口吸收砵酒的甜味後變得更爽口香甜。
黃小姐：我揀青口，青口酒味香啲。
綜合意見
青口酒味較香，好惹味；而鮑貝非常清甜，難分高下，若一定要二選一，青口味道豐富啲。
賽果
中式鮑貝2票
西式青口3票
豬蹄組 入味夠醒胃
中式代表：汾酒浸豬蹄片
汾酒出自山西汾陽縣，是中國四大名酒之一，以色澤清澈、芳香幽雅、甜味悠長而著名，而且味道獨特，令人一試難忘。汾酒少用於烹調，師傅創新以汾酒浸豬蹄，帶出新口味。師傅先將去骨豬蹄以鹽水烚熟，另一邊廂將汾酒煲熱讓酒精揮發，放涼後才將豬蹄浸於汾酒，一直浸至上碟前才夾起，完全入味。
麥太：汾酒浸豬蹄片好好食，入口好香！
西式代表：啤酒醉豬手
人所共知啤酒以德國出產的最出名，一般由水、麥芽、酒花發酵而成，味道甘苦，多用於烹調淡味食物。一般紅燒豬手都會加入啤酒，去除肉的腥味，而這次製法卻不同，大廚加入大量白醋，所以顏色晶瑩剔透，少少酸非常醒胃！
綜合意見
汾酒浸豬蹄片的酒味較香，而啤酒醉豬手就好醒胃作為前菜一流，但是以酒和材料配合來說，中式代表比較出色。
賽果
中式豬蹄片3票
西式豬手2票
最後賽果
中式酒菜較好味！
睇路搵食
世紀咖啡閣（25988888）
地址：灣仔謝斐道238號世紀香港酒店1樓
自助晚餐時間：6:30pm-9:30pm
自助晚餐收費：星期一至五成人$168小童$108；星期六、日成人$188小童$108
交通：灣仔地鐵站A1出口，沿駱克道往銅鑼灣方向行兩個街口轉左行至謝斐道。
有着數：4至12歲小童可參加現場遊戲，勝出者的自助餐收費減$30。