不知從何時開始，每日中環街頭都有籌款活動，除咗星期六有定期賣旗籌款之外，呢排見到唔少老人家喺街頭叫人買獎券，唔係話唔想做善事，之不過花多眼亂，一啲籌款團體名不見經傳（可能左丁山孤陋寡聞之故），中環人捐款未免有啲猶疑，態度唔見踴躍。
呢輪講籌款，民建聯就夠卡士，夠威風咯，一個晚會就籌到五百萬，真唔講得笑。其中拍賣籌款，唐司長捐一箱紅酒，底價五萬，梁振英以二十三萬元投得；梁愛詩捐出「明月天空」琉璃佛像，民建聯監委會副主席、牛仔褲大王楊釗以三十三萬元買入；肥龍捐出自己嘅愛瑪仕領呔，底價一千，王賜豪醫生以八萬元投得，王醫生唔買八千條新呔而買一條肥龍舊呔，識do到極。
除咗自由黨啲領導階層個個有水，籌款不愁之外，其他政黨冇資格仿效民建聯。你估民主黨、公民黨、前線等搞籌款晚會，可以一晚捐到五百萬元咩，籌五十萬都艱難，起碼唐司長唔會捐出一箱名貴紅酒先啦。
公民黨為梁家傑參選行政長官，辦步行籌款活動，今個星期日（十四號）上午十時半起行，由山頂柯士甸山遊樂場行到薄扶林傷健協會薄扶林傷健營，沿途風景甚佳，步行一至一個半小時，可說心曠神怡，最啱住響山頂班晨運客參加。唔講得笑，山頂晨運客之中，有唔少億萬富豪，佢哋一人捐一萬，都有百幾萬啦。聽講梁家傑佢哋唔抱太大希望，今次籌款目標只係五十萬元啫，人哋民建聯一箱紅酒，一尊佛像，一條呔，已經籌得六十四萬，邊度使搵二三百人出嚟步行呀！
其實喺一月十四日籌款，左丁山有條「以小博大」嘅好橋，就係梁家傑可以搵五位大狀，每人捐一千，集資五千大元，搵黨內賽馬專家細心度一條三T下注，今日有三T多寶三千八百萬，一注獨中可能有五、六千萬，中咗嘅話，公民黨就變成富貴黨，唔使再憂柴憂米。如果輸咗，唔見得有乜損失啫。