新年伊始，證券及投資銀行界又有新人事調動。百富勤創辦人梁伯韜舊下屬──符耀文（彼得符）沉靜咗半年，聽講上星期到咗建設銀行旗下建銀證券返工，做話事人。雖然都係sellside，但就唔係做番佢嘅老本行投資銀行。
華華聽聞，彼得符今次係得到建銀北京總部人士推薦，有靠山咁話。
不過，自從建銀國際（專做投資銀行業務）董事總經理陳秀山舊年中過檔工商東亞，建銀證券好似唔多齊腳，𠵱家加埋研究部都係得十零人。彼得符應該要重組班底先得。
彼得符01年離開百富勤後，轉咗幾份工，先去咗新協城市做行政總裁，唔夠一年重返證券界，喺京華山一做咗一年話事人，03年過檔金英做融資部董事總經理，舊年中去咗舊同事高寶明搞嘅金榜融資，其間冇乜聲氣，估唔到轉頭又泊到新碼頭。