非聯賽球會譚禾夫喺上個禮拜六場英足盃第3圈，雖則畀到訪嘅英冠諾域治踢出局，但喺門票同埋電視直播就擸咗成25萬鎊（約380萬港紙）。佢哋忽然發達，即時引起賊人注意，喺當晚畀3個持械賊仔嚟佢哋球場嘅酒吧「光顧」，洗劫店內嘅收銀機同職員，財物損失有5位數。好彩比賽當日嘅門票收入唔喺酒吧入面，如果唔係損失仲嚴重。