勞資關係同婆媳關係一樣，要雙方和諧共處，機會可能僅僅高過中六合彩，退咗休嘅zeke1喺《MSN討論區》話：「我呢世人遇過唔少衰波士，佢哋嘅衰嘢多籮籮，例如偏幫自己友、違反勞工法、應承咗加人工又唔加，同埋容忍各種唔正當嘅關係。」
muchbetternow講：「新上司一上任就話要改善業務運作，後來又大搞裙帶關係，拉埋成班『皇親國戚』嚟返工，管治能力好差，令員工不滿。」呢位網民某日向上司提出意見，話公司新買嘅座椅好唔舒服，點知上司即刻叫佢收聲，後來仲俾人無理解僱。
Bummed-out話：「上司以前做嘢好落力，結果升任主管；但佢冇受過管理訓練，缺乏人際溝通技巧，一做咗主管就變成『暴君』，唔識體諒下屬嘅苦況，要求太高，結果好多員工頂唔順，劈炮唔撈。」
Grunt就呻，佢波士經常喺顧客面前講佢嘅壞話，令佢好冇面，於是決定另謀高就，寧願搵份人工低啲嘅工，好過再受老闆氣。
JennyA21102話佢曾經向公司人事部投訴，但由於佢上司係做咗30年嘅老臣子，人事部唔聽佢講，搞到員工士氣好差。結果喺一年半內，公司嘅員工流失率高達九成，認真誇張！
受人二分四好勞氣
打工仔受人二分四，有時真係好受氣。美國佛羅里達州大學一項調查發現，美國「辦公室虐待」問題嚴重，近四成員工話，佢哋嘅主管講話唔算數；超過四分一職員認為，上司經常喺背後講下屬壞話。專家話，一個缺乏管理技巧嘅主管，會打擊公司士氣，令生產力下降，仲會產生更多問題。