近排灣仔會展中心舉辦玩具及文具展，搞到好墟冚，其實會展正進行中庭通道擴建，估計09年啓用，起碼多萬幾兩萬多平方米用，但做人點都要未雨綢繆，工商科技局長王永平噚日喺立法會話，貿發局正研究會展第三期擴展計劃，會喺今年定出具體方案，令展覽面積擴展至超過10萬平方米。
平叔話，選址原則係要距離現址不太遠，唔使填海同埋唔會帶來交通壓力。
貿發局總裁林天福就話香港展覽業發展空間好大，可以搞好多不同類型展覽，例如藝術品、古董、音樂、醫療、園藝等。佢又話，香港其實有條件做華南地區嘅展覽中心，好似舊年書展，內地有人組團嚟睇，如果可以做到好似日本世博咁，吸引遊客為咗睇展覽而嚟香港，咁就最理想。