有消費者投訴訂製家具手工差勁，除了床板拱起，木材更布滿污迹、膠布和破損痕迹，質疑產品差劣有如「廢物利用，循環再造」。
讀者潘太表示，其女兒於去年11月在深水埗元洲街的祥盛傢俬裝飾設計，以7,000多元訂做兩張單人床、一個企身櫃及兩個吊櫃，「有個姓雷嘅師傅上門度尺，阿女講明要用實木做材料。」但付足全費、12月中安裝後卻發現貨不對辦。
似曾濕水有霉迹
「貼喺傢俬表面嘅木紋紙，貼到起『泡』又披口、有啲木材好似曾經濕水有霉迹、床板就唔平，『谷起』差唔多成厘米，最離譜係有塊床板底有木皮飛起，要用膠布貼住，好似執啲爛木做材料！」潘太事後向傢俬店投訴，「姓雷嘅負責人話啲傢俬係外判畀大陸做，唔關佢事，冇得換，佢嘅態度好惡劣！」
本報致電祥盛傢俬裝飾設計，有一位雷先生稍後覆電表示，投訴人女兒在門市已了解該店設計及使用材料，滿意質素才訂做，「每件傢俬都有唔同價值，如果幾萬蚊做張床，就可以要求十全十美。」但當記者質疑該公司陳列品的材料是否一如其強調，質素與投訴人所收到的一致，會有膠布固定破損木皮和污迹時，雷先生即「掛線」。
檔案編號：1226040