好友同淡友呢幾日鬥得好激烈，就算冇參與其中嘅股民，睇吓成交同指數點樣變化，都已經感受到，雖然好友同淡友嘅願望係相反嘅（想賺錢嘅目的就一樣），但係都希望借住國壽A股掛牌決生死，於是乎隻國壽（2628）就順理成章成為昨日全場嘅焦點。
國壽A股掛牌大幅高開，的確帶起咗港股嘅氣氛，但好嘅時光留唔住，轉過頭就碌返晒落嚟，揸咗國壽C輪嘅股民可能會好激氣，因為好多隻C輪開市嘅價都好曳，完全跟唔足正股個勢，槓桿效應突然之間消失咗，睇數據就話引伸波幅縮咗好多，但係正股咁波動，引伸波幅又點會咁縮，呢種情況大家都心知肚明係乜嘢事，班莊家轉過頭就「插」啲C輪，走遲啲隨時要輸錢離場，你話啲莊家咁搞法，點會唔令啲窩輪炒家一肚氣？
睇番外圍個市同埋昨日國內股市嘅表現，港股應該可以食住前日低位反彈個勢炒上去，但係「摩笛追魂」一出，加埋細摩一齊唱淡A股同H股，仲要指明國內金融股風險好大，自然可以抗衡國壽A股上市帶來嘅動力，話之國壽A股升超過100%收市，H股照跌4.6%，其他保險同銀行股點會唔洩氣？不過，好淡大戶鬥法，唔係話「唱吓淡、吹吓笛」就得，好友都會部署還擊。
中石化C輪6135：中石化（386）昨收7.25元，逆市升1.68%，股價喺10日線現「十字胎」，昨日再整個「陀螺」，成交輕微增加，今日有機會升破7.40元收市，咁就可以推向8元嗰頭。
中石化C輪6135昨收96仙，槓桿率7.6倍（有效4.9倍），對沖值67，正股升上8元，6135應該唔會平過1.50元，呢個價買，正股跌穿6.85元止蝕。
俊樺