摩連奴發火,肯定非同小可!被譽為「新馬基列尼」嘅車路士中場狄亞拉因兩周內三度違反會規,被重罰6萬鎊(約91萬港元);同時,車仔續受四方八面「襲擊」,拜仁主席漢尼斯勁彈車仔領隊摩連奴,根本唔曉點用舒夫真高同波歷克,嘥晒!
漢尼斯彈摩連奴唔掂
年僅21歲嘅狄亞拉真係唔識死,喺上周六足總盃鬥馬爾斯菲嘅比賽,佢知道首次獲得正選,應該好開心至係,點知特登遲到40分鐘作無聲抗議,抗議啲咩?之唔係佢想被借去法甲球會巴黎聖日耳門不獲批准囉!而佢更係一不做二不休,扮大牌無故缺席周一操練,連串惡行終於激嬲咗摩連奴,後者金口一開,重罰佢6周周薪,承惠6萬鎊!
車路士近期戰績欠佳,摩帥首當其衝,遠在德國嘅漢尼斯就話佢根本用唔掂「小凱薩」波歷克同「軍刀」舒夫真高,更衣室內氣氛異常沉重!摩帥就回應所有人都要為近期戰績負責!
另外,車仔喺足總盃第4圈嘅對手諾定咸森林,都不忘抽抽水。森林守將巴尼特話:「我喺PS2同車仔較量過後,已經懂得對付佢哋嘅秘訣!」理由極度荒謬,但呢班友咁大口氣,相信車仔到時都有排受呀!
「狄亞拉以為自己係邊個?𠵱家車仔風頭火勢,摩連奴連帥位都唔知保唔保到,一吓唔覺意,摩帥隨時話賣就賣,到時佢喊都無謂囉!」