每逢三四月都係業績公布期，聽講今年啲酒店宴會廳嘅booking好爆，皆因愈嚟愈多公司喺香港上市，業績記者會同分析員簡報會，自然愈嚟愈多！
姚波擔大旗代斯蒂芬
去過平保業績會嘅分析員同傳媒朋友，應該記得平保有位總精算師名叫斯蒂芬．邁爾，每次簡報會都坐喺台上回答大家問題。不過，呢位擁有劍橋大學和倫敦大學兩個碩士嘅「洋軍師」，啱啱調咗做顧問，下次簡報會將由年僅36歲嘅姚波擔大旗。
獲紐約大學碩士學位嘅姚波，啱啱被調升為總精算師，喺高層中最年輕，佢本身亦係北美精算師協會嘅正式會員。
除咗佢之外，仲有四位集團總經理助理，獲升任副總經理，包括陳克祥、任匯川、吳嶽翰同羅世禮，年齡介乎38至49歲，其中吳嶽翰同羅世禮，分別嚟自美國漢密爾頓大學同劍橋大學，可見平保着意起用外國大學畢業嘅人，似乎有心想走向國際化。
順帶一提，吳嶽翰原來來自香港，其實𠵱家平保總經理張子欣都係香港人，睇嚟平保都幾着重香港人才。