肥仔C召集中學同學重聚，到窩打老道一間酒店食晚飯，佢話訂咗五圍枱，請大家食自助餐，懷想當年青春少艾，左丁山如時去到，肥仔C幾豪氣，訂咗成個大廳，可惜只有十幾人到場，咁多食物，點吃呀。冇所謂啦，大家志不在吃，只重聚舊，尤其是有兩位老師在場，更加親切。
體育老師Y面色紅潤，聲若洪鐘，佢位公子Y醫生忙於到醫院接生，唔得閒嚟。老師Y話佢鄉下嚟咗八個孕婦，由領導帶隊，話明要Y醫生接生，但係冇醫院有床位喎，點搞好？老師Y為咗啲鄉親，下令Y醫生諗辦法，故此Y仔（係我哋同班同學）周圍撲病床，與同學重聚都冇時間。
做咗油漆專家嘅同學S話：「現時普遍價錢係，開刀四萬，傳統法接生三萬，Y仔一日做兩個，日入七萬，條數好大喎！」老師Y立即否認：「邊度有咁好景，冇冇，冇咁多錢收入。」打個折頭都有一百萬蚊一個月啦，同學們，快啲申請讀醫科，專攻產科！
讀書不是求分數，讀書是求銀紙！老師Y好似識得睇相，佢指住左丁山話：「以前上堂我都知道你係叻仔，但係入錯行吖，轉轉吓做咗傳媒，正式係有名無利，你冇乜錢嘅啫！」俾佢一語道破，好彩自己唔會面紅，亦都只有老師先至敢當面講呢番說話。講搵銀，打工不出頭，在座三位有錢同學都係做廠嘅。同學S老早上岸，肥仔C呢十年好掂，佢話：「十年前銀行唔肯借一個斗零畀我，現在銀行成日叫我借錢，我一於一個斗零都唔借。我啲家俬產品出口去全世界，有廠房二百萬呎，唔使問銀行借錢，我全無壓力，日子過得好輕鬆！」另外有好多年冇見面嘅紡織L，佢話：「雖然多年冇見，我知你同肥佬好熟。」邊個肥佬呀？紡織L笑笑口話：「佢搞公明，我搞公和！」唉吔，乜世界細得咁緊要，同班同學紡織L竟然係肥佬黎嘅創業時代拍檔，到𠵱家先至知道㖭。
食完坐的士返屋企，樓下有一架紅色法拉利泊喺度好搶眼。鄰居話：「呢位車主C醫生有十幾部車，最近揸厭勞斯萊斯，買咗部新法拉利玩吓！佢久唔久就嚟呢度探父母。」唉，讀乜鬼文科哩，讀醫咪好囉。