美國運通發行嘅著名「黑卡」Centurion，話係全城最尊貴卡戶身份代表，睇怕都冇人異議，除咗有番咁上下財富地位，才獲邀成為會員外，黑卡嘅貼身秘書服務，無微不至，就更加不在話下。
華華噚日同運通香港區總經理古益川飯局，席間講開聖誕節期間，佢哋嘅黑卡客戶秘書服務量，比去年同期升咗四成，話說，客戶當中有位尊貴嘅客戶，想訪尋一隻在網上見過嘅藏獒品種小狗，結果，運通同事花咗3個星期時間，先至喺奧地利幫個客搵到，為佢完成心願。
集中火力銷白金卡
由於本港財富增長高速，今年經濟又暢旺，所以運通今年會集中火力推廣白金信用卡，冀發卡量可增加5成，佢又相信，擁有100萬美元以上流動資產嘅高端消費持卡人，今年整體市場簽賬消費，會增加約一成。
佢哋仲好有心思，特別用朱古力做張信用卡畀傳媒，配合今年嘅目標。