國壽A股第一日上市就升逾倍，反映內地炒風熾熱，股價幾乎完全偏離基本因素。喺《香港討論區》有網友做咗一個意見調查，問大家覺唔覺得內地同胞炒A股炒到癲咗？
憂中央遲早出手
57%網友認為，內地投資者確實炒A股炒到癲咗，相信中央遲早再出手，調控一吓升幅過急嘅股市；20%網友話A股升得急，跌得一樣咁急，遲早大跌市；不過，17%人則指A股未算炒到癲，因為內地資金充裕，愈炒愈有；只有7%網友認為，H股將會受拖累，形成回吐壓力（見圖）。
網友jackylam8231稱：「大陸人投資，個個都係睇短線，好少人會睇長線，估計A股遲早會下挫。」格萊爾擔心，「佢哋咁搞法，擺明係想將全球股巿推到去崖頂，準備大家一齊跳。」網友HDSI表示：「國內資金充裕，見到稍為優質嘅股票，就一窩蜂走去掃貨，根本唔理基本因素及盈利表現可否支撐得住。如果中央再加大宏調力度，股市就跌得更厲害。」bobochan2更指：「國內同胞好勇，之前炒爆A股，今年好番又嚟過。」
至於香港股民就積落唔少怨氣，而佢哋啲怨氣似乎係俾大、細摩支「摩笛」吹出嚟！事緣摩根士丹利（大摩）及摩根大通（細摩）前幾日調低國壽目標價到17蚊，隨即俾網友勁插。
大行唱淡等掃貨
咁大摩呢個目標係咪咁「理性」呢？有芬佬話大行「做嘢」，一向不外乎嗰幾招，但壽仔𠵱家仲叫做喺24蚊頂到吓，話落到20蚊會比較多人信囉！再加埋有唔少散戶之前真係因為啲大行唱好先入貨，唱淡到17蚊，當然群情洶湧。之但係，亦有散戶跟到大、細摩步伐買平貨，只係為數唔多！
正如網友illily講：「就係個個都唱淡先好明顯準備吸貨，大行啲貨都好平，佢掟少少出嚟，既套現又質低個價，質到咁上下又買平貨……佢哋一直都係用呢招賺錢。」
國壽A股經過首日狂升，噚日仍未收斂，最高升至40.3元，收市報39.46元，再升1.36%。至於國壽H股（2628）則跌勢未止，噚日收23.9元，再跌6.64%。