「人哋講笑話，我都唔識笑。」人在異鄉，言語不通真係無奈。兩膺中國足球先生嘅山東魯能球員鄭智，正式落實借去英超查爾頓至季尾後，終於參加咗首課操練；佢一如以往外流歐洲嘅同志般，同洋人溝通總存語言隔閡，非常冇癮！
煲英語天書都冇用
外形硬朗嘅鄭智接受專訪時談及處子練波：「首課操練係8打8嘅對抗賽，領隊柏度冇指定叫我打咩位置，但我覺得自己唔係好緊張，發揮正常。」佢坦言查爾頓隊友都歡迎佢加盟：「羅美度同戴倫賓特都有操練，佢哋好熱情吓，但因語言障礙，所以我哋都係用身體語言溝通多。」
雖然鄭智出發前自己狂煲英文語法書，做晒筆記，但「實戰」時又係另一番光景，佢無奈話：「我覺得柏度係好傳統嘅英國教練，場上嚴肅，場外就風趣幽默（係真唔係呀？），但佢講嗰啲笑話我就聽唔明喇，淨係見到隊友猛咁笑，連繙譯都笑埋一份，我自己就冇癮咯！」
場上決定果斷嘅鄭智，一講到英文即時耍手擰頭：「我上咗第一課英文堂，老師都讚我叻仔呀（樣子有點囂），但我都知仲要若練多一排，先可以同隊友喺場上溝通得自然啲，順暢啲嘅！」
「中田英壽喺意甲最威風嗰陣，意大利人一見亞洲人就叫『Nakata』，唔知第日求大俠去到倫敦，會唔會有人叫我『ZhengZhi』呢？」