樓宇買賣過程中，業主同買家周不時會討價還價，究竟點衡量雙方叫價、還價係咪合理？網友Teresa最近就遇到以上疑難，所以喺《親子王國》請教眾網友，佢睇啱一層二手樓，但幾間銀行都估唔到業主放盤嘅價錢，相差成30萬；業主又唔肯減價，問係咪唔應該再追價呢？
好心嘅angiedodo話可以介紹「手鬆」嘅銀行畀Teresa，「希望幫你估到價。」不過，Jackielee就質疑，「如果銀行純粹因為同顧客關係好先估到價，咁呢個就已經唔係物業本身嘅真實價值。」
唔少網友都勸Teresa三思，bebepopo話︰「如果佢個單位唔係有豪裝而導致銀行估唔到價，咁我覺得你唔好自己補價。」魚生認為樓市近排只係虛火，買家有條件慢慢揀，照佢分析，「個市係旺嗰兩、三個月，但我覺得只係啲人趕住買新樓過年，我諗過完年會淡，同埋呢排好多業主又封盤唔睇住，好似無乜供應咁！咪搞到好似好渴市咁囉！」
專家教路 兩招拆解
業內人士話銀行估價，通常係參考同類物業最近期喺政府註冊成交嘅紀錄；估價不足，除咗因為業主叫價過份進取，仲有兩種情況：一，由成交到完成登記，需時近一個多月，其間如樓價急升，銀行所掌握嘅資料就可能唔夠貼市；二，物業有豪華裝修、贈送家電等，令價值較其他相關物業為高。
他教路，如買家遇到第一種情況，可要求業主延長成交期，等銀行攞到最新資料後先估價；如屬第二種情況，買家可要求銀行派員視察物業嘅實際狀況。
報料站
歡迎提供任何古靈精怪的網上財經趣事，文稿、照片或短片資料一經採用，酬100元。請附姓名、電話及電郵地址，交[email protected]