一向認為，玩得MINICooper，個個都應該係有番咁上下「士戴佬」（包括我在內），可能車廠亦深明此真理，所以未踏入07年，車廠着手玩玩新意思，繼早前搶閘推出的全新版本MINICooperS外，最近連入門版MINICooper都被列入「被玩」之選，皆因新版不單加入「一㩒掣」即變跑版操控嘅過癮玩法，內櫳顏色配搭更可按喜好而組合，車身黃、內櫳紅、燈光藍……嘩！十足十玩化妝舞會一樣。
記者：黃婉冰
攝影：林栢鈞 Model：Chimpy
5隻主色撞出幾十個配搭
同CooperS唔同，今次MINICooper潮玩襯色，車主可以在出車前，隨自己喜好揀車廂顏色，包括車門扶手位、儲物箱上方的內飾、面板、座椅套等，淨係真皮內飾就分別有深灰、杏、藍、紅、黃5個Colour，深淺隨你喜好。面板仲多，有6個唔同顏色同Pattern任揀，由MINI最經典的Racing格仔花到高貴桃木俱備，而座椅則有全皮、布×皮2個選擇，雖然全屬Options，但起碼全部都係原廠色同手工，可以襯得番車身顏色，唔怕搞到鴛鴦色咁失禮街坊。車廂顏色有得揀之外，今次新車最大突破係居然連車廂燈都有紅、黃、藍及其他等5種顏色，總之想點襯就點襯，自己撞色，咁就唔怕同人「撞車」啦。
「SportButton」
操控似跑車
講完玩款玩襯色，操控上亦加入新動感元素──SportButton！咪睇小呢粒掣，一按動之後，成架車個表現會唔同晒，試過用普通模式去駕控，起步爽，一路上用+/-波箱轉波，夠利落，高波拖低波入彎得心應手，無論高波轉低波或由低波轉高波亦夠暢順，駕控感同一般歐洲車仔無咩分別，舒舒服服，啱晒女仔揸，唯獨是個入波方式唔係好習慣，轉波方向上下掉轉，需時習慣。
試完一圈，終於按捺唔住手痕痕㩒着個Sport掣，唔㩒猶自可，一㩒即刻有火，唔使大啖油，輕踩油門，成架車已經標住去，油門明顯比之前敏感，速度感大增。再試吓轉彎，雖然未至於好似跑車咁硬，但軚感明顯Firm咗，感覺更實在、更穩，增加咗唔少碇彎樂趣！
MINICooperSpec.
引擎：1,598c.c.直4
馬力：120bhp/6,000rpm
扭力：16.3kgm/2,500rpm
傳動：6前速半自動波
車價：＄238,000
車輛提供：MINIHK（31299018）