睇咁多年英足盃，有幾何見默西塞德雙雄喺英足盃第3圈就齊齊被拉下馬？利物浦輸畀強敵阿仙奴就無得講，愛華頓前日主場被布力般流浪大數四個一皮，就點講都難交代。查實愛華頓唔係輸實力，而係輸畀個波，同埋輸在準備工夫唔夠，講到尾都係抵輸。
皮球夠飄令侯活出醜
呢場波，愛華頓個美國龍門侯活表現大失水準，布力般嘅達比舒利、摩頓柏達臣入嗰兩球，侯活都好似慌失失，連領隊莫耶斯賽後都公開批評佢。布力般領隊曉士賽後公開呢場波勝出嘅秘密，話知道英足盃用嘅專用皮球，同平時英超用嘅皮球唔同，前者比較「飄」，於是過去一個禮拜狂操呢個英足盃皮球，仲練埋遠射，果然令侯活束手就擒。曉士球員時代踢波以勇猛同鬥心行先，估唔到執教鞭後咁細心，備戰得咁好，抵佢隊波贏波晉級嘅。
莫耶斯輸得心服
當有記者將曉士番話轉述畀莫耶斯聽，莫耶斯至好似如夢初醒咁，話自己其實都有留意盃賽同聯賽用唔同嘅波，一樣都有操個英足盃皮球，但可能係無對方操得咁足啫，總之係輸得心服口服啦！
「咪話我求大俠想像力豐富，德國足球不嬲以精算、備戰好取勝，而曉士球員時代效力過拜仁慕尼黑，唔知係咪咁，學晒德國佬算無遺策嘅足球精髓呢？」