楊千嬅噚日去咗銅鑼灣一間酒店出席保良局活動，原本佢要同一班公公婆婆煎過年糕點，不過千嬅話自己唯一一次煎糕就煎到變晒炭，所以企埋一邊就算。其實千嬅貪玩就係人都知，佢最近拍新戲《阿妙的十年》期間，就因為貪玩唔小心跌親，認真論盡。
願為Paco效力
早前千嬅以千萬轉會費轉投林建岳旗下，有雜誌話千嬅轉會後，岳少重視佢仲多過啱啱得到叱咤女歌手金獎嘅何韻詩，噚日有行家向千嬅求證此事，問佢岳少係咪攬住佢嚟錫，千嬅即刻笑唔停口咁話：「你估我係寵物呀？芝娃娃呀？呢啲新聞每次轉會都一定有，唔寫就真係要秤一秤自己點解冇人寫喇。」
千嬅又話今次轉投新公司只不過好似出糧單位唔同咗咁，而佢喺電影方面仲有好多嘢想試，新公司寰亞電影呢方面就夠晒強勁。千嬅又話如果Paco（黃柏高）搵自己幫手一樣無任歡迎，不論電影音樂甚至合唱都冇問題咁話。
