要喺舊年大牛市賺錢唔難，但想喺今年位高勢危又大上大落嘅市賺錢，就唔係人人做得到，相信好多唔知點算好嘅散戶，會諗起電視劇《大時代》入面嘅經典對白──「真正會玩股票嘅人又有幾多呢？」有網友就以此為題，喺《公眾投資168綜合論壇》上面開咗個討論區，叫大家嚟分享心得。
最高境界 休閒地賺
聰明仔第一個回應：「我覺得最高境界係一邊休閒一邊賺錢，贏咗去做慈善家。成日對住大利市機嗰啲，就算賺錢都浪費青春；仲有嗰啲幫大鱷賺錢，大熱天時仲要着老西，請我都唔做。」網友catalina搭嘴：「呢啲咪係傳說中嘅『財務自由』囉！」
hahababa直接話：「意思咪係唔會畀股票玩！」catalina再加一句：「到最後人人死晒，你仲可以賺到笑就係啦！」叫自己做價值人嘅網民，就好超然咁話：「應該係擺脫咗追逐金錢嘅慾望（夠一世不用煩惱，舒適生活就算）……到死嗰日過萬億身家又如何？」
網友omaha就畀咗個實際啲，但要求較低嘅比較基準，「過咗幾次股災都有得賺，而且回報高過擺喺銀行收息。」聰明仔分享自己嘅心得：「炒到予取予攜嘅境界，多數唔捨得收，但其實咁係倒番轉頭俾錢控制……唔好忘記咗做呢樣嘢嘅本來目的。」
沒有準則 各適其適
時富資產管理聯席董事姚浩然話，其實玩股票無話點至算係識玩，每個人都有適合自己嘅一套，「無話係啱定唔啱，最緊要自己知自己買緊乜，仲要抱住自己係畀錢間公司去投資、去發展業務，唔好諗住今日買、聽日賣就實有得賺！」
信誠證券聯席董事連敬涵認為又勤力又有運氣，就叫做識玩股票啦！佢話：「玩股票前，首先要睇熟公司年報同通告，仲要睇新聞，keep住市場觸覺，知道呢排邊類股票當紅，最後再加上運氣。」各位讀者睇完咁多意見後，到底認為自己識唔識炒股票呢？