中信泰富太子爺做咗阿三，做阿二嘅董事總經理范鴻齡按理一早就知，但華華噚日見佢出席貿易發展局嘅亞洲最大型玩具展開幕禮，似乎冇乜影響，反而展商嘅玩具就搞到佢樂極忘形。
范鴻齡噚日為玩具展做主禮嘉賓，佢話𠵱家啲玩具五花百門，多姿多采，單係嬰兒市場，就可以自成一角，仲有糖果玩具，可以一邊食糖，一邊玩玩具，花款多多。更令佢回想起童年，范鴻齡感觸良多咁話，嗰陣時淨係得一種玩具，就係玩手指，玩到悶就玩埋腳趾，邊似𠵱家啲細路咁幸福。
唔知係咪要彌補童年嘅失落，佢好有耐性咁觀賞展館攤位，起碼行咗成粒鐘有多，仲試玩咗好多最潮嘅電子玩具，好似電子結他、電子鼓等，而且仲玩得好鬼投入。