蘋果電腦行政總裁兼「iPod之父」喬布斯（SteveJobs）近排都算「黑仔」，較早前捲入高層涉認股權追溯期風波，雖然公司經內部調查後力撐佢；但上月底又被揭發，喺01年未獲董事局批准下，獲發750萬股認股權，連董事局開會文件都係偽造，令佢再度跌入醜聞，蘋果股價亦受牽連。
《MSNBC》討論區內，唔少網友對事件深表關注，尤其係iPod嘅fans同股民。擺明撐喬布斯嘅mygawd話：「我好欣賞佢嘅領導才能同創意，雖然身為CEO，但未必對公司每項細節都瞭如指掌，所以公司要聘請專家掌管唔同事務。至於有關認股權嘅範疇，喬布斯好明顯唔係呢瓣嘅專才，捲入醜聞係無心之失，佢冇攞着數，應該放佢一馬。」
1蚊年薪但獲厚禮
蘋果擁躉itsybitsy就話：「如果喬布斯因貪欺詐，就應該由佢自己獨力承擔、送佢入獄，絕對唔希望見到蘋果電腦因為CEO行為失當而垮台。」Sleuth2對於企業相繼爆出認股權醜聞，歸咎當局監管過鬆，「如果喬布斯真係有罪入獄，希望到時佢嘅iPod喺獄中可以大派用場。」
不過，citizenjj就為呢班高層平反，佢話無論係巨企定中小企、高層定基層都總有害群之馬，呢啲係人性醜惡，與職級無關。sugarmelter就話：「好似喬布斯呢啲位高權重嘅CEO，年薪其實只象徵式收1蚊美金咋！」根據《維基百科》嘅資料顯示，喬布斯多年來只收1蚊年薪，係健力士世界紀錄大全最低收入CEO嘅保持者。不過，佢每年會收到董事局嘅厚禮作為報酬，當中包括喺99年獲贈價值4600萬美元嘅飛機，及00至02年收到3000萬股限制性股票。
報料站
無論在網上網外發現任何古靈精怪的財經趣事，歡迎提供文稿、照片或短片資料，一經採用，酬100元。請附姓名、電話及電郵地址，交[email protected]