豪宅同香水大纜扯唔埋，點解新鴻基地產推銷元朗葡萄園，會將兩樣嘢放埋一齊？
其實，新地一直將個盤定位為充滿異國風情嘅貴族酒莊生活品味盤，目標買家非富則貴，生活高尚，所以早排講完紅酒，呢排就講香水。
個盤有160幢洋房，新地特別發展部銷售總監陳秀賢講，會用800萬元為每位住戶度身訂做香水——嘩，只調製160支，1支咪要5萬港紙！集團同成立超過兩個半世紀嘅香水廠Galimard合作，喺法國有香水之都稱號嘅格拉斯（Grasse），搵嚟調香師JacquesMaurel來港調製，唔怪得咁貴。
外國富貴人家早已時興呢種調製個人香水玩意，包括阿拉伯公主、荷李活名人明星等，呢種非一般人嘅玩意，對香港買家嚟講，都算新鮮。