偉仕控股上月公布靚靚中期業績，純利倍增至7370萬元。噚日主席李佳林宴請傳媒，席間談及其賺錢妙法。
佢話，做軟件分銷業務，同行嘅毛利都差唔多，得嗰5、6個巴仙，生意要做得好，最關鍵係有良好嘅管理技巧。例如偉仕嘅存貨周轉期只得15日，同行嘅神州數碼，就要30日。呢樣嘢講嚟容易，就好似係人都知點樣可以減肥，但要落實做到就最考功夫，偉仕就係靠日積月累嘅經驗得嚟。
佢喺席間透露咗幾招，話好注重貨物流轉速度，因為流轉快，同一筆資金可做多幾轉生意。仲有就係同客戶建立良好關係，佢會容許推銷員向客戶提供補貼，以應付變幻莫測嘅市價，但當然要合理，唔係就變成腐敗；而喺貨品缺貨時唔會坐地起價，嚟吸住客仔長期關係。