大家呢頭先經歷百年一遇至熱嘅10月、11月，諗住都冇得凍；點知呢幾日突然跌到落10℃，啲羊腩煲同㷫烚烚火鍋馬上出晒嚟！食到膩晒嘴？黃猄、梅花鹿、BB羊腿批又啱唔啱嘴形呀？唔使自己打獵咁辛苦！去土瓜灣「大漠」仲有罕見新疆式食法，包你食到熱「辣辣」、暖笠笠。
記者：朱崇德 攝影：何家亮
Model：Naomi
話北帝街係土瓜灣食街絕不為過，短短兩個街口有30多間食店，Cafe、糖水、上海菜、茶餐廳、日本料理，真係有多把嘴都食唔切！當中最惹人注目嘅係「大漠」；唔好話成條街獨玩新疆菜，成個香港都唔係好多地方食到！
新疆白做學廚
總廚金先生擁有30年酒店西廚經驗，突然轉做新疆菜，原來當中經歷1年背囊友學廚生涯：「我去新疆中部庫車，全為學煮新疆菜！主要搵啲小店舖，咁先體味出正統鄉土風味。每去1間餐館，基本都係唔收人工『白煮』，當地人先會請你，學嘢嘛就要蝕底啲！新疆菜特色在肉食同香料配搭烹調得宜，香料味重又略帶辛辣！」背囊生涯仲有一個收穫，就係呢度嘅二廚都係當地回民，所以在「大漠」一定食到正宗新疆風味！
紅紅綠綠梅花鹿$88
起初話食梅花鹿肉都驚驚哋，試一啖，唔羶喎！味道近似牛肉，但肉味濃啲，油份唔高、肌肉纖維緊密啲，「係東北冰鮮貨，先有咁香肉味同鮮嫩口感！」配新疆香料同孜然，非常惹味！「其實可連同車厘茄、薯茸同生菜包嚟食，口感仲Fresh。」
新疆青金提煸黃猄片$88
黃猄補身暖胃，味道同梅花鹿有幾分相近，不過肉地更滑；燜煮後，再以辛辣的新疆香料輕輕一炒，再拌以哈密瓜、青瓜及青金提同食，增添清怡口感，想得幾周到。
新疆黑啤燴小羊腿$68
新疆黑啤本是淡口唔稠，但加了杜仲等中國滋補藥材，馬上有如白蘭地般酒香四溢！特別訂購未滿周歲的BB小羊腿作此菜，貪佢夠嫩口之餘，更重要是更易入味又易咬，冇柴皮感。
新疆土豆茸海鮮脆蜜梨$58
好鬼馬！以蜜梨加新疆番薯搓成泥狀，再重塑成「蜜梨」；入口好杰身，裏面清甜，又有薯茸的細軟質感，更聰明是加入魷魚、青口等海鮮提味兼增其口感。
孔雀河回鍋盲鰽魚$78
孔雀河乃新疆地名，本以河鮮入饌，但現改用淡水盲鰽魚滾油快炸，魚件外香內軟；「回鍋」，是以亁鑊配新疆辣椒香料快炒；魚件入口微辣甘脆，感覺極暖，咬至魚心，細緻軟滑，口感豐富。
開完餐飲茶消消滯
放入熱水會開花的金盞菊茶好多人都飲過；但呢杯是特別訂製的，紅色小花是「新疆梅」，花微香，茶味濃，極消滯。$12
食神評級(5隻★為滿分）
服務：★★★★
環境：★★★★★
價錢：★★★★
讚：食物有特色、罕見新疆菜館！除咗食物，環境刻意營造少數民族感覺，感覺好正！
彈：新疆菜明顯做咗「減辣」工序！如果可以俾客人自己選擇會更好。
睇路搵食
大漠（27144483）
地址：土瓜灣北帝街27號C地下
營業時間：星期一至日11:30am-3:00pm、6:00pm-11:30pm
座位：40個