車路士捧歐冠盃，曼聯奪英超，阿仙奴贏足總盃，剩低個聯賽盃，當然留畀利物浦！以上賽果純粹靠估，毫無分析可言，不過，又好似可能發生喎！
今個星期嘅焦點，當然係利物浦對阿仙奴嘅聯賽盃。上周六，兩隊已經響足總盃交手，高下立見，兵工廠贏波，不過唔夠說服力；我認為係贏在路斯基嘅質素及利物浦後衞發波瘟。阿仙奴沒甚麼精采組織，想學巴塞，唔係咁易噃！加上利物浦太慢熱，下半場先識得踢波；教訓過後，相信聯賽盃會有好表現。
至於西班牙盃，大家睇完星期六、日嘅西甲歇冬後首日比賽，應該又一次印證西甲歇冬後，球隊例走樣嘅傳說啦！西維爾同皇馬輸波，巴塞和波，最誇張當然係畢爾包作客大勝！
當然，正路咁估，馬體會、薩拉戈薩、華倫西亞同巴塞響今、明兩晚都應該贏；不過，我會用番上周西維爾場波嘅策略，因為我有啲擔心，所以只估入球大細，點知西維爾真係輸埋，邪到爆！
周鵬
商業1台《球迷集中贏》主持
電郵：[email protected]