近年大部份新樓，唔理豪宅定蚊型盤，都以附設會所為賣點，大家仲記唔記得尖沙嘴凱旋門個3億元摩天會所，比單位本身更搶鏡；就算單幢樓都騰出地方擺健身器材，充當會所，連房協重售嘅居屋屯門景新臺，都以附設住客會所做賣點。不過，原來唔少人都唔鍾意層樓有會所㗎，認為嘥地方兼冇乜時間用，Nevaeh喺《香港討論區》講：「日日返工，放咗工都想喺屋企唞吓啦；放假又想出去行吓，邊有機會用會所。會所要養一班保安、職員等，費用真係唔少。」
小賤男話：「𠵱家個社會就係咁，乜都valueadded，用唔用都add咗先，因為add嗰部份，全部係profit位。真係唔明買樓係人生大事，偏偏就係冇得選，畀啲地產佬屈你要呢樣要嗰樣。」
屈你要 冇得揀
心水清嘅fungyanyuen1認為：「會所設施可以令發展商提供一條龍服務，用番佢嘅管理公司、電訊商等等。商場亦有發展商嘅超市、電器店等。發展商除了賺取樓價利潤外，還有幾萬名住客成為旗下超市、電器店、電訊業的必然顧客。」
chak0：「近年嘅新樓，真係令人覺得無得揀，變相迫人買舊樓，會所愈嚟愈大，間隔愈嚟愈細，又唔實用，價錢愈嚟愈貴。」太和仔：「我都覺得會所無咩用！頭一兩年可能貪新鮮玩吓，過後就玩厭啦！況且大部份設施要每次收錢，仲要比出面貴，唔係管理費包埋嘅咩？」eddieywlee：「一兩年貪新鮮？我諗係頭半年㗎咋，真係要維持一兩年新鮮感，就要買長實樓咯，入伙兩年先有會所。」講緊嘅應該係將軍澳勁蝕新盤都會駅，要等二期城中駅入埋伙先有會所用。
睇嚟發展商係時候參考吓民意，畀啲空間買家選擇，尤其單幢樓，反正住戶有限，唔整會所，提高番單位嘅實用面積，已經係一個好強嘅賣點。