內地車廠地頭蟲——吉利汽車（175）母公司吉利控股，噚日公布06年銷售收入達90億元人仔，升咗41.9%，利潤有14億元，賺咁多錢，自然心雄。吉利董事長李書福過去一直想將吉利呢個平民化嘅汽車品牌，躋身上流之列，亦試過唔少計仔，如改善產品質素，但始終因為個藍色標誌（圖）俾人話「娘」，阻住升格，搞到啲買家最後都轉軚買其他牌子。
可能係咁，李董痛定思痛，換過新標誌，噚日向全球發布徵集新設計，希望藉此脫胎換骨，提高檔次，同時比賽亦會引起國際市場留意。不過，呢條橋成本唔少，吉利要攞360萬元出嚟做獎金，當中200萬係畀冠軍嘅獎金，而冠軍設計嘅新標誌，初定喺08年8月面世。灰姑娘都要有包裝，要入上流社會，點都要裝身！