國壽A股上市，大幅搶高後又質低，港股亦「受惠」，大上大落，國壽H股（2628）升2元後倒跌1.25元收市；H指最高10323，升220點，但最低之時質到9856，高低相差467點，收市9967，仍大跌135點。至於恒指亦係好大波動，高位20173，低位19794，高低相差379點，收市19898，跌131點。恒指同H指的兩個重要關口，分別係2萬點同1萬點都同日失守。
大市繼續調整，但個別消息股同實力二三線股就接力而上，噚日唔計認股證嘅上升股同下跌股都超過400隻，但上升嘅多幾隻，唔少資金從中資股中調去細價股上，炒番轉，呢個趨勢相信會維持一段短時間。
小圓底收集已完成
香港建設（190）個勢好勁，收1.50元，升4.9%，且有1420多萬股大成交配合，衝破保歷加通道，而MACD今日亦會出現「雙牛」入貨訊號，由去年11月中開始的小圓底收集形態已完成，中期上升大浪開展，初步上升目標係11月中的高位1.65元，中線可見2字頭。
港建市值唔細，發行股數有36.45億股，市值54.6億元，但大股東印尼黃氏家族已持有21.82億股，佔71.84%，而去年11月做「披成」的6.6億股（售價1.10元），亦全部被基金接晒，呢手貨已佔發行股數18.1%，實際街外流通的貨量只得10%，扣埋上海建工持有的4.9%，街外貨源更疏。
港建原本已有資金約7億元，連同集資所得的6億多元，全部都會用作支援集團兩大業務，地產和風力發電之用。港建轉型後，內地地產佔最大比重，達70%；再生能源風力發電佔20%，餘下10%係老本行的建築業務。
港建在內地已擁有多個地產項目，分別位於天津、浙江南潯、上海虹口區地王、深圳地王商業中心及北京京廣中心等。噚日有消息，話大股東已安排將價值60億元的上海項目分段注入，第一步係將港建的持股量由10%增至25%，之後再增至50%，大股東話到明要將港建市值壯大到100億元，只要股價「坐二望三」，就會實現。
郭兆誠