世事真係唔知有冇咁蹺，記者早排喺婚姻註冊處發現有個職業係節目主任、現年46歲，個名叫夏妙然嘅女士，同一個細自己4年嘅男空中服務員龔明達註冊結婚。
唔介意姊弟戀
結婚話晒係喜事，噚日馮仁昭打電話同夏妙然講聲恭喜，點知佢否認婚訊，仲話：「同名同姓嘛？我未有打算結婚，就算填節目主持，都可能係咁蹺啫﹗」
問夏妙然𠵱家有冇拍拖？佢話：「有啲囉！」咁同男友有冇共識計劃結婚？佢就話：「冇諗過喎！始終自己本身都有個家庭，太敏感喇！感情嘢真係唔講。」馮仁昭追問佢男友係咪細過自己，夏妙然就口快快咁話：「年紀唔係問題！」
根據擬結婚通知書上面嘅資料，呢個夏妙然除咗個名以及職業同港台DJ嘅夏妙然相同外，連生日日期都一樣，但夏妙然又唔認結婚，事件認真離奇。
