2007年首輪西甲戰火重燃，周中又踢西班牙盃16強首回合，真係替班球員辛苦。
華歷簡奴自從03年降落乙組後，上返唔到甲組不特止，仲降到落丙組！好彩今季丙組聯賽表現唔錯，𠵱家響榜首，而連埋上一圈淘汰愛斯賓奴，佢哋已經連續11場不敗，不過今場面對西維爾，就明顯輸蝕。「1哥」西維爾今季主客演出好穩定，難怪能壓住巴塞同皇馬排榜首。論整體人腳同級數，西維爾起碼高華歷簡奴幾班，而西維爾又已連續8場開大；加上兩隊近16次交手有10次開「大」，寧可揀「大」。
另一場直播有艾拉維斯越級挑戰巴塞隆拿。上一圈艾拉維斯雖挫切爾達晉級，但乙組成績一般，好在主場至今保持不敗。巴塞歇冬後首場聯賽走晒樣，作客打和基達菲已有所交代。由於西班牙盃16強係踢兩回合，巴塞可能留力次回合主場出擊；不過，點計巴塞後備兵實力都高過艾拉維斯，贏波問題不大。
阿鵬
有線球彩台主持
電郵：[email protected]