上個禮拜尾，國壽（2628）俾大戶由高位「質」咗落嚟，跌咗近2蚊，令唔少高位入貨嘅散戶提心吊膽。噚日開市前，網友Pkelf喺《香港討論區》好驚咁講，「再跌嘅話，就真係短線變長揸啦！」而V6V更預咗「五保三行」會冇運行㖭，但國壽昨日早段嘅表現無想像中咁差，企穩喺25蚊左右。
晏晝國壽更愈升愈急，而網友嘅心情亦反彈，F4就好得戚咁不斷叫人入貨，佢話：「我從未驚過，淡友成日喺度吹佢跌，根本唔使理佢哋，我有錢都仲想再入貨，我睇30蚊㗎。」小狼就頭頭是道咁話：「國壽早幾日被大戶聯手沽貨，無非係想震走晒啲散戶，然後再喺低位買番晒，又賺差價又揸平貨，呢招都好毒喎。」
網友格萊爾就諗，「國壽回升係偷步炒佢今日上A股。」而有網友估就算今日國壽A股嘅價有幾咁彪炳都好，H股嘅升幅只會溫和。