小記者G問左丁山：「我入行唔算耐，但採訪財經新聞已有一段時間，知道上市公司好注重盈利，如有虧損，一定累親股價，CEO甚或職位不保，如果長期虧蝕，一係俾人收購，一係清盤關門，冇話一路拖落去，搞到冇糧出，俾員工告上法庭嘅。嗱，我唔明嘞，《成報》換咗老闆後，冇一年好過，換完老闆又換老闆，點解蝕本公司一路有人買，蝕大本竟然唔肯執笠，死咁拖，情願欠薪、欠稿費呢？」
幾乎畀小記者問到口啞。過往報紙執笠，全部係自願嘅，停業前付清稿費、薪水、遣散費，未試過鬧上勞工處、鬧上法庭。過往報紙冇另類價值，蝕得多，唯有趁有錢清理後事之時就停業，以免老闆聲譽受損。咦，今時今日好似唔同世界喎，報紙有另類價值，蝕本唔會話就快執笠，總之內有玄妙。
小記者即刻追問：「乜嘢係另類價值？」唉吔，唔講得咁多嘅，總之揸住張報紙，上京做生意會比較吃得開。炒家C曾經對左丁山講過：「有人叫我買一張報紙，此人會派人去管理，唔使我煩，我淨係出錢就得㗎嘞，如有蝕本，當然係我負責啦。」問炒家C：「右手蝕，左手可唔可以賺番？」炒家C話：「未諗清楚，但正如李兆基接受《信報月刊》訪問咁講，買股、買ELN加買賣窩輪，賺錢十分容易，好過做地產。我做乜嘢要孭住張報紙，又要諗左手賺番嚟補貼右手咁麻煩？我炒股賺兩三個開，易過借火啦！」
係咯，麻煩嘢最好唔做，偏偏有人專搵麻煩嘢搞，有乜因由，我哋呢類凡夫俗子，完全唔係嗰個層次，點會識吖。
左丁山叫小記者G毋須為報紙欠薪新聞傷腦筋咯，積累多啲經驗，佢一定會明白，有時間不如為母校樹仁大學做吓義工仲好。樹仁兩老胡鴻烈鍾期榮夫婦捱咗三十幾年，卒成正果，連李國章都感動，主動撥款兩億元資助之，相信唔會有立法會議員反對，如有議員嘈，左丁山叫小記者G發動樹仁校友（傳媒界有好多），齊去質問之！小記者G笑住講：「呢啲義工我一定義不容辭。」